அம்ருதா பொறியியல் கல்லூரியின் சிவில் பொறியியல் துறை மற்றும் திருச்சி என்ஐடி இணைந்து ஏற்பாடு செய்த நிலையான கட்டமைப்பிற்கான மாடலிங் மற்றும் பகுப்பாய்வு முன்னேற்றங்கள் குறித்த சர்வதேச மாநாடு (AMMA SRI-25), கோவை அம்ருதா விஸ்வ வித்யாபீடத்தில் மூன்று நாட்கள் நடைபெற்றது.
நிலையான கட்டமைப்பில் புதிய கண்டுபிடிப்புகள் குறித்து கலந்துரையாட கல்வி மற்றும் தொழில்துறையைச் சேர்ந்த முன்னணி நிபுணர்களை ஒன்றிணைத்துள்ளது.
இந்த நிகழ்வை கொல்கத்தா என்ஐடியின் முன்னாள் பேராசிரியர் (HAG) மற்றும் டீன் பேராசிரியர் கணேசன் தலைமை தாங்கி தொடங்கி வைத்தார். இந்நிகழ்வு பல்வேறு அமர்வுகள் மற்றும் கலந்துரையாடல்களை உள்ளடக்கியது.
பேராசிரியர் கணேசன் தனது தொடக்க உரையில் பேசியதாவது: “Urbanisation மற்றும் காலநிலை மாற்றம் முதல் இயற்கை வளங்கள் குறைதல் வரை நாம் மிகப்பெரிய சவால்களை எதிர்கொள்கிறோம். இச்சவால்களை நிவர்த்தி செய்வதை முக்கிய நோக்கமாக கொண்டு ஆராய்ச்சியாளர்களை ஒன்றிணைப்பதற்கு AMMA SRI-25 போன்ற மாநாடுகள் முக்கிய பங்கு வகிக்கிறது. நிலைத்தன்மை நமது தொழில்நுட்ப தீர்வுகளை மட்டுமல்ல, நமது அணுகுமுறைகள் மற்றும் வாழ்க்கை முறைகளையும் வழிநடத்த வேண்டும். நீண்டகால தீர்வுகளில் கவனம் செலுத்தி, நாம் எப்படி வாழ்கிறோம் என்பதை மறுபரிசீலனை செய்ய வேண்டிய நேரம் இது, வருங்கால சந்ததியினருக்கு சிறந்த எதிர்காலத்தை உறுதி செய்கிறது. நேர்மறையாக பங்களிக்கவும், தாய் பூமியைப் பாதுகாக்கவும் உறுதிமொழி எடுப்போம். இவ்வாறு அவர் பேசினார்.
இந்நிகழ்வில் கவுகாத்தி ஐஐடி முன்னாள் பேராசிரியர் (HAG) சுதீப் தாலுக்தர், மும்பை NPCIL இணை இயக்குநர் (சிவில்) பிரபாகர் குண்டலபள்ளி, சிங்கப்பூர் NUS இணைப் பேராசிரியர் டாக்டர் டேரன் சியான் சியாவ் சென், டாக்டர் சஞ்சய் குமார் சுக்லா (நிறுவன புவி தொழில்நுட்ப மற்றும் புவி சுற்றுச்சூழல் பொறியியல் ஆராய்ச்சி குழுத் தலைவர், எடித் கோவன் பல்கலைக்கழகம், ஆஸ்திரேலியா), டாக்டர் அஜய் ஜெகதீஷ் (விரிவுரையாளர் மற்றும் இடைக்காலத் தலைவர், TU டெல்ஃப்ட், நெதர்லாந்து) உள்ளிட்ட சிறந்த பேச்சாளர்கள் பங்கேற்று உரையாற்றினர்.
இந்த மாநாட்டில், அதிநவீன பொருட்கள், மேம்பட்ட மாடலிங் நுட்பங்கள் மற்றும் நிலையான கட்டமைப்பு மேம்பாட்டிற்கான பகுப்பாய்வு முறைகள் குறித்து விவாதிக்கப்பட்டது.
